Konfirmohet vizita e Blinkenit në Shqipëri

Departamenti amerikan i Shtetit, e ka konfirmuar vizitën e Sekretarit të Shtetit, Antony Blinken, në Shqipëri. Në njoftimin e DASh-it thuhet se Blinken do të udhëtojë në Tiranë dhe Mynih të Gjermanisë nga 14 deri më 17 shkurt. "Në Tiranë, Sekretari Blinken do të riafirmojë fuqinë e marrëdhënieve të Shteteve të Bashkuara me Shqipërinë, një partner kyç për stabilitetin në Ballkanin Perëndimor dhe një aleat i fortë në mbështetjen e sovranitetit dhe integritetit territorial të Ukrainës", thuhet në njoftim, transmeton Klankosova.tv. Ndërsa, sipas DASh-it, në Mynih, Blinken do të marrë pjesë në Konferencën e Sigurisë, si pjesë e delegacionit të ShBA-së, të kryesuar nga zëvendës presidentja Kamal Harris. "Sekretari do të zhvillojë takime dypalëshe për të nënvizuar mbështetjen e qëndrueshme të Shteteve të Bashkuara për popullin e Ukrainës, për të vazhduar diskutimet me partnerët se si të arrihet paqe dhe siguri e qëndrueshme në Lindjen e Mesme dhe për të theksuar angazhimin tonë të palëkundur për sigurinë transatlantike. Sekretari Blinken do të bashkohet gjithashtu me partnerët ndërkombëtarë për një forum publik mbi multilateralizmin", thuhet në njoftim.