Kompanitë prodhuese vendore në takim për themelimin e Shoqatës së Prodhuesve në OEK

Këshilli Iniciativ për themelimin e Shoqatës së Prodhuesve të Kosovës, që përfshin të gjitha degët e prodhimit, ka mbajtur takim. Kryetari i Odës Ekonomike të Kosovës, Lulzim Rafuna, ka mirëpritur kompanitë prodhuese vendore për rithemelimin e kësaj shoqate, duke theksuar rëndësinë e tyre në zhvillimin ekonomik të vendit dhe problemet, me të cilat ato ballafaqohen vazhdimisht. “Themelimi i Shoqatës së Prodhuesve në nivel të Kosovës do të ishte një hap shumë i rëndësishëm përpara në zgjidhjen e problemeve dhe përmirësimin e ambientit ekonomik për ndërmarrjet prodhuese vendore”, thuhet në kumtesë, transmeton KlanKosova.tv. Rafuna i ka cilësuar prodhuesit vendor si aktorë shumë të rëndësishëm në rritjen e punësimit, ngritjen e vlerave ekonomike e sociale, ngritjen e imazhit të vendit dhe kontributin e tyre të vazhdueshëm në fuqizimin e sektorit privat në vend.