Kodi i ri Penal është gati

Ministri i Drejtësisë, Abelard Tahiri, sot e ka prezantuar Kodin e ri Penal. Ai ka thënë se procesi i hartimit të ndryshimeve që janë bërë në Kodin Penal ka qenë proces transparent dhe demokratik, njofton Klan Kosova. “Në këtë ndryshim ka marrë pjesë shoqëria civile. Ky Kod Penal është produkt në harmoni të plotë me standardet e Bashkimit Evropian”. Sipas ministrit Tahiri, në hartimin e Kodit të ri janë bazuar në tri parime themelore: përcaktimin e qartë për sundim të mirëfilltë të ligjit dhe luftë kundër korrupsionit dhe krimit të organizuar, fleksibilitet më i madh në punën e organeve të pavarura të zbatimit të ligjit dhe mbrojtje, promovim dhe avancim të nocionit të të drejtave të njeriut.

Në nenet që përcaktojnë luftë më të ashpër ndaj korrupsionit dhe krimit të organizuar, ai ka bërë të ditur se janë ndryshuar nenet që nga kontrabandimi e deri te mashtrimi dhe prodhimi i produkteve të dëmshme, si dhe ri-përcaktimin e veprave penale të korrupsionit, keqpërdorimit të pozitës apo autoritetit zyrtar, marrjen e dhënien e ryshfetit, mashtrimin në detyrë, etj.

Sipas Tahirit, këto ndryshime i japin një përgjigje të fuqishme kërkesave për parandalimin e veprave korruptive në nivelin e ushtrimit të detyrës zyrtare.

“Dënimet për vepra penale që ndërlidhen me korrupsionin, ku do që ka pasur mundësi janë rritur dhe janë bërë kumulative në vend se alternative. Këto masa janë përkushtim konkret i yni për të mbrojtur integritetin e institucioneve tona dhe për të parandaluar dhe luftuar korrupsionin në mënyrë të vazhdueshme dhe të pa  kompromis”.

Edhe ndryshimet e parapara me koncept dokumentin për suspendimin e zyrtarëve publik në rast të ngritjes së aktakuzave për korrupsion janë përfshirë në këtë Kod të ri Penal, njofton Klan Kosova.

 “Rrjedhimisht, janë propozuar amendamentet e reja që i ndalojnë personit zyrtar ushtrimin e funksionit në administratën publike apo në shërbimin publik deri në 10 vjet nga aktgjykimi dënues. Kjo dispozitë parasheh që kur zyrtari publik të dënohet për vepër penale të korrupsionit, atij t’i ndalohet ushtrimi i funksioneve në shërbim publik deri në dhjetë vjet".

Ministri i Drejtësisë ka bërë të ditur se ky kod nesër do të jetë në mbledhjen e Qeverisë së Kosovës që të procedohet më pas për në Kuvend.