"Koalicioni s’ka mundësi të prishet"

“Nuk mendoj se buxheti do ta rrezikojë apo do ta vë në pikëpyetje të ardhmen e koalicionit qeverisës. Në fakt, pakënaqësitë që mund t’i kenë njerëzit e caktuar brenda subjekteve politike nuk janë reflektim i qëndrimeve të partnerëve të koalicionit. Janë më tepër pakënaqësi individuale të njerëzve brenda subjekteve politike sesa qëndrime të partnerëve të koalicionit”, ka deklaruar Ahmeti, duke iu kundërpërgjigjur pakënaqësive të zyrtarëve të PDK-së lidhur me buxhetin e vitit të ardhshëm.

“E rëndësishme është tërësia dhe jo individualiteti i askujt dhe në kuadër të kësaj e shoh që për shoqërinë e Kosovës është e nevojshme të vazhdojë ky koalicion për t’i përmbushur objektivat dhe detyrimet që ka marrë jo vetëm ndaj qytetarëve, por edhe në raport me bashkësinë ndërkombëtare. Prandaj tani për tani koalicioni nuk ka mundësi të prishet. Megjithatë, mbetet të shihet se si do të rrjedhin gjërat në të ardhmen”, ka theksuar ai.