Kalon mbi 320 mijë numri i llogarive të pagesave për shërbime bazike

Mbi 320 mijë ka shkuar numri i llogarive të pagesave për shërbime bazike, sipas të dhënave të Bankës Qendrore të Kosovës. Ky institucion u ka bërë thirrje qytetarëve që të hapin llogari në çdo bankë, ku grupet e cenueshme nuk paguajnë fare, transmeton KlanKosova.tv. “Në kuadër të një qasje proaktive, me qëllim të lehtësimit të procesit dhe reduktimit të barrës për qytetarin, për të gjithë ata që tashmë kanë një llogari bankare dhe plotësojnë kriteret për llogari bazike, BQK me vetë-iniciativë ka zhvilluar veglën teknike të verifikimit online nga çdo bankë në Regjistrin e Llogarive Bankare të BQK-së. Kjo mundëson që banka të verifikojë lehtësisht dhe aty për aty nëse një qytetar ka ose jo llogari tjetër bankare, që mundëson konvertimin me efikas në llogari bazike, sipas kritereve të përcaktuara”, thuhet në kumtesën e BQK-së. “Me Draft-ligjin i ri për Sistemin e Pagesave, që është në proces të finalizimit, edhe institucionet financiare jobankare do të kenë të drejtë qasje në sistemin e kliringut të pagesave me vlerë të vogël, në kuadër të Sistemit Kombëtar të Pagesave, duke ju mundësuar kështu të jenë konkurrues dhe efektiv në procesin e qarkullimit të pagesave në vend”. BQK ka falënderuar gjithë sistemin bankar për fleksibilitetin e treguar për konvertimin e të të gjitha llogarive të skemave pensionale dhe sociale.