Edhe për dy muaj të tjerë është vazhduar masa e paraburgimit ndaj tre të dyshuarve për agresionin në Banjskë më 24 shtator të vitit të kaluar, V.T, B.S dhe D.M.
Për Klankosova.tv, këtë e bëri të ditur Medina Gashi, bashkëpunëtorja profesionale nga zyra e kryetares së kësaj Gjykatës Themelore më Prishtinë, njofton Klankosova.tv.
"Gjykata Themelore në Prishtinë – Departamenti Special me datë 20.08.2024 ka marrë Aktvendim dhe ka aprovuar kërkesën e Prokurorisë Speciale të Republikës së Kosovës, ashtu që masa e paraburgimit tre të pandehurve iu është vazhduar në kohëzgjatje prej dy muaj", ka thënë Gashi për Klankosova.tv.
Të njëjtit i morën dy muaj paraburgim edhe më 21 qershor të këtij viti, kurse në paraburgim janë nga 26 shtatori i vitit 2023.
Më 24 shtator në Banjskë të Zveçanit një grup paramilitar, në krye me terroristin Millan Radoiçiq, kishin sulmuar Policinë e Kosovës, ku pati mbet i vrarë rreshteri Afrim Bunjaku.
Policia pati intervenuar ku kishte vrarë tre terroristë dhe kishte arrestuar disa të tjerë. /Klankosova.tv
●●●
LGSHKRIMI NGA
L. Ga.
Editorial nga Klan Kosova — ndjek lajme dhe zhvillimet e tjera kryesore të vendit.
