Izraeli njofton zgjerim të vendbanimeve në Bregun Perëndimor të pushtuar

Qeveria izraelite ka miratuar ndërtimin e 22 vendbanimeve të reja hebreje në Bregun Perëndimor të pushtuar, në atë që konsiderohet si zgjerimi më i madh i vendbanimeve në dekadat e fundit. Ministri i Mbrojtjes, Israel Katz, dhe ministri i Financave, Bezalel Smotrich, thanë se disa nga këto vendbanime tashmë ekzistojnë si “outpost”-e të ndërtuara pa miratimin e qeverisë, por tani do të legalizohen sipas ligjit izraelit. Çështja e vendbanimeve është një nga pikat më të nxehta të konfliktit izraelito-palestinez. Ato konsiderohen të paligjshme sipas së drejtës ndërkombëtare, megjithëse Izraeli e kundërshton këtë interpretim, raporton BBC, transmeton Klankosova.tv. Katz tha se ky vendim “parandalon krijimin e një shteti palestinez që do të rrezikonte Izraelin”, ndërsa presidenca palestineze e cilësoi veprimin si një “përshkallëzim të rrezikshëm”. Organizata izraelite kundër vendbanimeve “Peace Now” paralajmëroi se vendbanimet e reja do të “riformojnë në mënyrë dramatike Bregun Perëndimor dhe do ta thellojnë më tej pushtimin”. Që nga lufta e Lindjes së Mesme më 1967, Izraeli ka ndërtuar rreth 160 vendbanime që strehëzojnë afërsisht 700,000 hebrenj në Bregun Perëndimor dhe Jerusalemin Lindor – territore që palestinezët i konsiderojnë pjesë të shtetit të tyre të ardhshëm.