Izraeli gati të deportojë Greta Thunbergun dhe aktivistë të tjerë

Greta Thunberg dhe aktivistë të tjerë pro-palestinezë janë dërguar në aeroportin e Tel Avivit përpara deportimit të tyre. Kështu tha Ministria e Jashtme izraelite të martën, pasi marina izraelite i pengoi ata të lundronin drejt Gazës. Forcat izraelite hipën në anijen bamirëse ndërsa ajo iu afrua Gazës herët të hënën, duke u përpjekur të thyenin një bllokadë detare shumëvjeçare të enklavës bregdetare, dhe kapën ekuipazhin prej 12 personash, përfshirë aktivisten suedeze Thunberg, raporton Reuters, transmeton Klankosova.tv. Jahti me flamur britanik u dërgua në portin izraelit të Ashdodit dhe ministria e jashtme tha se aktivistët u transferuan brenda natës në aeroportin Ben Gurion. "Disa nga pasagjerët e 'Selfie Jacht' pritet të largohen brenda orëve të ardhshme," tha ministria në një deklaratë. "Ata që refuzojnë të nënshkruajnë dokumentet e deportimit dhe të largohen nga Izraeli do të çohen para një autoriteti gjyqësor, në përputhje me ligjin izraelit, për të autorizuar deportimin e tyre". Përfaqësues konsullorë nga vendet e origjinës së pasagjerëve i pritën ata në aeroport, shtoi ajo. Aktivistët kishin mbajtur një ngarkesë të vogël me ndihma humanitare, përfshirë oriz dhe formulë për foshnje, dhe thanë se donin të rrisnin ndërgjegjësimin ndërkombëtar për krizën humanitare në Gaza, e cila është shkatërruar nga muaj të tërë lufte.