Ismajli: Zhegra po i përgjigjet thirrjes për të qëndruar në shtëpi

Nënkryetari i Komunës së Gjilanit Arbër Ismajli i shoqëruar nga Drejtori i Shëndetësisë Selami Xhemajli kanë vizituar Qendrën e Mjekësisë Familjare në fshatin Zhegër ku është një rast i paraqitur me Covid-19. Ekipet shëndetësore të këtij fshati kanë konstatuar se gjendja është e qetë dhe nuk ka shqetësime sa i përket rasteve të reja me Covid-19. “Deri më tani nuk kemi ndonjë rast të ri që është paraqitur me simptoma që duhet të intervenohet. Fshati është duke respektuar rekomandimet e dhëna nga ekipet shëndetësore për qëndrim në shtëpi. Gjendja është nën kontroll dhe lëvizje të qytetarëve apo të veturave nuk ka. Nëse do të vazhdohet në këtë mënyrë, gjendja do të jetë shumë më lehtë e menaxhueshme deri në tejkalimin e situatës”, kanë thënë mjekët kujdestarë. Ismajli ka konfirmuar se Komuna e Gjilanit ka marrë të gjitha masat e nevojshme dhe tashmë është përgatitur kontigjenti material mbrojtës për familjet e prekura, barnat për trajtim nëse është e nevojshme dhe pakot ushqimore për familjet të cilat janë në gjendje të rëndë ekonomike dhe sociale - të cilat për këto ditë janë shpërndarë dhe do të vazhdohet tek të gjitha rastet ku është i nevojshëm intervenimi me mbështetje sociale.