Ish-agjentët e Stalinit kërkojnë mbylljen e të dhënave për ta

Pasardhësit e agjentëve të policisë sekrete të ish-diktatorit Jozef Stalinit i kanë kërkuar qeverisë që të mbyllë bazën e të dhënave të hapur së fundi me informacione për rreth 40 mijë agjentë. Ata agjentë janë të përfshirë në mënyrë të drejtpërdrejtë në vrasjen e rreth një milion qytetarëve sovjetikë gjatë Terrorit të Madh të Stalinit. Disa pasardhës të kësaj policie i kanë shkruar një letër të hapur presidentit rus, Vladimir Putin, i cili edhe vet është ish-agjent i KGB-së, duke i kërkuar atij mbylljen e bazës të të dhënave, raportojnë mediat ruse. Baza e të dhënave është krijuar nga fondacioni për të drejtat e njeriut, “Memorial”. Ai është i pari i këtij lloji që ofron informacione të detajuara rreth autorëve të krimeve gjatë periudhës së Stalinit. Pasardhësit e kanë arsyetuar kërkesën e tyre duke thënë se ata “frikësohen për fëmijët, nipat e mbesat dhe stërnipat e stërmbesat (e agjentëve) pasi rrezikojnë të bëhen cak i hakmarrjes për hir të paraardhësve të shtypur”. Fondacionit “Memorial” i janë dashur 15 vjet për të mbledhur informacionet e kësaj baze të të dhënave.

klankosova.tv