Indonezia raporton rritjen më të madhe të rasteve, 24 mjekë të vdekur

Indonezia ka raportuar gjatë të hënës rritjen më të madhe ditore të rasteve të reja me koronavirus. Asociacioni i Mjekëve të Indonezisë ka njoftuar se kanë vdekur edhe 24 mjekë të cilët po trajtonin pacientët e prekur me Covid-19. Rritja e numrit të vdekjeve në mesin e mjekëve, që është dyfishuar nga java e kaluar, vjen pas kritikave të shumta të Asociacionit të Mjekëve dhe disa organizatave joqeveritare - përfshirë edhe Amnesty International - që personeli shëndetësor po përballet me mungesë të pajisjeve mbrojtëse. 281 rastet e reja me koronavirus në Indonezi e kanë çuar numrin e përgjithshëm të të infektuarve në 2491, derisa 209 vdekjet e konfirmuara është shifra më e lartë e regjistruar e vdekjeve në Azi. Ekspertët shëndetësorë kanë thënë se përqindja e lartë e vdekjeve në numrin e konfirmuar të rasteve është një shenjë se shpërthimi është shumë më i madh se sa të dhënat zyrtare tregojnë për vendin e katërt më të populluar në botë. Javën e kaluar, Agjencia e Inteligjencës së Indonezisë ka zbuluar se pret që rastet me koronavirus të arrijnë në kulm në tre muajt e ardhshëm – duke tejkaluar shifrën prej 100,000 rasteve në muajin korrik./ Klan Kosova