Hulk Hogan, legjenda me një trashëgimi të përzier në botën e mundjes profesionale

Hulk Hogan, një nga emrat më të njohur në historinë e mundjes profesionale, mbetet një figurë ikonike, por edhe kontraverse, që ka lënë gjurmë të thella në sportin dhe kulturën amerikane. Legjenda e mundjes, Hulk Hogan, ka ndërruar jetë në moshën 71-vjeçare. Hogan, i lindur Terry Gene Bollea, u gjet i vdekur në shtëpinë e tij në Clearwater, Florida, të enjten në mëngjes. Nga Terry Bollea në “Hulkimani” I lindur si Terry Bollea në vitin 1953, Hogan fillimisht iu bashkua Federatës Botërore të Mundjes (sot e njohur si WWE) në vitin 1979, por u largua përkohësisht në vitin 1981. Ai u rikthye për të shkruar histori në vitin 1985, kur ishte pjesë e ndeshjes kryesore në “WrestleMania I” në New York, përkrah aktorit Mr. T. Së bashku ata mposhtën Paul Orndorff dhe Roddy Piper – një ngjarje që e çoi mundjen drejt popullaritetit masiv. Yll në ring dhe në ekran Gjatë viteve ’90, fama e Hogan kaloi kufijtë e ringut. Ai u shfaq në filma të njohur si Mr. Nanny dhe Suburban Commando, duke forcuar figurën e tij si hero i familjeve amerikane dhe duke rritur më tej ndikimin e tij në kulturën pop. “Hall of Fame” dhe njolla në trashëgimi Në vitin 2005, ishte pak surprizë që WWE e futi Hulk Hogan në “Hall of Fame” – një nderim për figurat më të mëdha të historisë së mundjes. Në vitin 2020, ai u nderua sërish si pjesë e grupit legjendar NWO. Megjithatë, në vitin 2015, WWE ndërpreu kontratën me të dhe e hoqi nga “Hall of Fame” pasi u publikua një regjistrim ku Hogan përdorte një shprehje raciste. Reagimi dhe rikthimi i debatueshëm Në vitin 2018, WWE e riktheu Hogan duke thënë se "çdokush meriton një shans të dytë", por reagimet nuk ishin të gjitha pozitive. Yje si grupi “The New Day” dhe mundësi Titus O’Neil shprehën publikisht zhgënjimin e tyre, duke thënë se “nuk është e lehtë të harrosh” atë që Hogan kishte thënë. Përfshirja në politikë dhe reagimi i publikut Në vitet e fundit, Hogan është parë shpesh në aktivitete politike, përfshirë tubimet e ish-presidentit Donald Trump dhe në fushatën zgjedhore në ShBA. Gjatë paraqitjes së tij të fundit në programin më të madh të WWE, “Monday Night Raw”, për të promovuar markën e tij të birrës, ai u përball me fishkëllima dhe pakënaqësi nga publiku, shkruan BBC, transmeton Klankosova.tv.