Deputeti i Kuvendit të Kosovës dhe ish-ministri i Jashtëm, Enver Hoxhaj, ka përkujtuar ditët e Epopesë së UÇK-së, duke theksuar se sakrifica e Adem Jasharit dhe familjes së tij mbetet themeli mbi të cilin u ndërtua liria dhe shteti i Kosovës.
Përmes një publikimi në Facebook, të shoqëruar me një video nga seanca solemne e Kuvendit të Kosovës, e organizuar në nder të këtyre ditëve përkujtimore dhe me këngën “Sërish vjen marsi”, Hoxhaj ka kujtuar rëndësinë historike të sakrificës së familjes Jashari.
“Po shënojmë ditët e Epopesë së UÇK-së dhe në themelet e flijimit të Familjes Jashari, ka lindur liria jonë, ka lindur shteti ynë. Lavdi!”, ka shkruar Hoxhaj.
Ditët e Epopesë së UÇK-së përkujtojnë rezistencën dhe sakrificën e familjes Jashari në Prekaz në mars të vitit 1998, ngjarje që shënoi një moment vendimtar në luftën për lirinë dhe pavarësinë e Kosovës.
Para ulëses së tij në Kuvend, Hoxhaj ka vendosur një fotografi të Hashim Thaçit dhe Kadri Veselit me mbishkrimin “25 vjet PDK. Identitet. Krenari”. /Klankosova.tv
●●●
ASHKRIMI NGA
A
Editorial nga Klan Kosova — ndjek lajme dhe zhvillimet e tjera kryesore të vendit.
