Haziri: Sot pranuam 640 doza të vaksinës AstraZeneca, prioritet për vaksinim kanë personat mbi 70 vjeç

Komuna e Gjilanit, përkatësisht Drejtoria e Shëndetësisë, sot ka pranuar 640 doza të vaksinës AstraZeneca. Kryetari i Komunës, Lutfi Haziri, ka bërë të ditur se prioritet është grup mosha e personave 70 vjeç, të cilët janë regjistruar, por që nuk janë vaksinuar akoma. “Ekipet e vaksinimit do t’i kontaktojnë qytetarët mbi moshën 70-vjeçare sipas planit dinamik të vaksinimit. Ndërkaq, kërkojmë nga qytetarët mbi moshën 65 vjeçare që të fillojnë të regjistrohen për vaksinim në Qendrat më të afërta të mjekësisë familjare. E kemi bërë planin që të mos shkaktohet tollovi në këtë proces të ruajtjes së shëndetit publik”, ka thënë Haziri. Kryetari i Gjilanit bëri të ditur se vaksinimi do të bëhet në Qendrën e Mjekësisë Familjare “Ramiz Cernica”, në rrugën “Pajazit Ahmeti” (afër tregut të rërës). Kujtojmë se në fazën e parë në Gjilan janë vaksinuar 1 mijë e 377 qytetarë të moshës mbi 75 vjeç, përfshirë edhe punëtorët shëndetësorë.