Haxhiu: Dita e diel do të jetë e Kosovës - dhe e Klan Kosovës

Drejtori gjeneral, Baton Haxhiu, ka folur për rastin e shënimit të 10 vjetorit të themelimit të Klan Kosovës, duke bërë të ditur se të dielën i gjithë stafi do të jetë në punë dhe i gjithë transmetimi do t’i kushtohet vetëm Klan Kosovës. Ai këto informata i dha gjatë një lidhjeje direkte për emisionin Info Magazine, me ç’rast theksoi se është hera e parë që Klan Kosova ta organizojë një ngjarje të tillë, ku autorët e të gjitha emisioneve do ta kenë rastin të flasin për veten e tyre. "Të dielën do të punojmë të gjithë, 206 kolegët, dhe do t’ia kushtojmë kohën vetëm Klan Kosovës. Bendin tonë të muzikës e kemi formuar dhe ai do të performojë këtë ditë". "Autorët dhe gazetarët e të gjitha emisioneve të cilat janë brenda konceptit të televizionit do të flasin për veten e tyre në ditën e diel. Për 10 vjet asnjëherë nuk e kemi bërë këtë". Haxhiu ka folur rreth faktorëve që e bëjnë një institucion të suksesshëm si Klan Kosova. "Komponenti që e bën një person dhe institucion të suksesshëm është - të zgjuarit herët”. “Midis gjeniut dhe njeriut të suksesshëm, unë e zgjedh këtë të fundit që zgjohet herët". "Nuk ka medium në Ballkan i cili ka kushte më të mira për punë”. “Klan Kosova -  me qendrën kulturore, me produksonet e veta, me galerinë dhe me pjesën e jashtme - e kompleton konceptin e vet". "Personalisht, unë do të pushoj pak duke ua lënë shikuesve që ta shijojnë këtë që kemi ndërtuar”.

klankosova.tv