Hansi Flick me kërkesë të veçantë për Laportan

Hansi Flick është i vetëdijshëm se për të synuar suksesin jo vetëm në Spanjë, por edhe në arenën evropiane, Barcelona duhet patjetër të përforcohet në repartin e mbrojtjes. Trajneri gjerman e konsideron këtë si një prioritet për sezonet e ardhshme. Për këtë arsye, Flick i ka kërkuar presidentit Joan Laporta afrimin e një qendërmbrojtësi që luan kryesisht me këmbën e majtë. Gjatë këtij sezoni, kjo pozitë është mbuluar nga Gerard Martin, i cili ka treguar potencial si një alternativë emergjente, por ende nuk ofron sigurinë e nevojshme për objektivat e mëdha të klubit, transmeton Klankosova.tv. Sipas raportimeve, dy emrat kryesorë në listën e dëshirave të Flick janë Alessandro Bastoni i Interit dhe Nico Schlotterbeck i Borussia Dortmund. Transferimi i Bastonit shihet si shumë i vështirë, duke pasur parasysh rolin kyç që ai ka te zikaltërit dhe rëndësinë e tij në projektin e klubit italian. Ndërkohë, Schlotterbeck ka bërë të ditur se mund të largohet nga Borussia Dortmund gjatë verës, dhe Barcelona paraqitet si një destinacion shumë tërheqës për mbrojtësin gjerman. Katalanasit mund të shfrytëzojnë këtë situatë për të përforcuar ndjeshëm mbrojtjen për sezonin e ardhshëm. /Klankosova.tv