Guterres kërkon para për UNMIK-un dhe misionet tjera të OKB-së nëpër botë

Sekretari i Përgjithshëm i OKB-së, Antonio Guterres, u tha vendeve se operacioni paqeruajtës i këtij organi botëror është “i fortë aq sa angazhimi i shteteve anëtare ndaj tij”, ndërsa u bëri thirrje atyre të martën që të paguajnë hisen e tyre. Departamenti i paqeruajtjes i Kombeve të Bashkuara aktualisht drejton 11 operacione, në vende duke përfshirë Kosovën, Kongon, Republikën Qendrore Afrikane, Sudanin e Jugut, Libanin dhe Qipron. Buxheti për nëntë prej këtyre operacioneve gjatë vitit fiskal që përfundon më 30 qershor arrin në total 5.6 milionë dollarë, 8.2% më i ulët se një vit më parë. Secili prej 193 vendeve anëtare të OKB-së është i detyruar ligjërisht të paguajë pjesën e tij për paqeruajtjen, raporton AP, transmeton Klankosova.tv. Guterres argumentoi se, me një buxhet “që përfaqëson një pjesë të vogël të shpenzimeve ushtarake globale – rreth gjysmën e një përqind – Paqeruajtja e OKB-së mbetet një nga mjetet më efektive dhe me kosto efektive për të ndërtuar paqen dhe sigurinë ndërkombëtare”. “Por është i fortë aq sa angazhimi i shteteve anëtare ndaj tij”, shtoi ai në hapjen e një konference dy-ditore të ministrave të organizuar nga Gjermania për të diskutuar të ardhmen e paqeruajtjes. “Fatkeqësisht, operacionet paqeruajtëse janë përballur me probleme serioze likuiditeti. Është absolutisht thelbësore që të gjitha shtetet anëtare të respektojnë detyrimet e tyre financiare, duke paguar kontributet e tyre plotësisht dhe në kohë”. Guterres nuk ofroi detaje mbi problemet, por pranoi se “këto janë kohë të vështira për financimin e punës sonë në të gjithë sektorin”. Në përgjithësi, OKB-ja është përpjekur t’i përgjigjet shkurtimeve të fondeve për operacionet e ndihmës nga donatori i saj më i madh, Shtetet e Bashkuara, nën administratën e Presidentit Donald Trump. Ministri i Jashtëm gjerman Johann Wadephul tha se vendi i tij, si shumë të tjerë, “është i përgatitur të premtojë burime shtesë” për paqeruajtjen. Por ai tha se duhet të ketë gjithashtu një përpjekje për t’i bërë misionet “më efikase dhe më të fokusuara” përmes mandateve më të qarta, duke ulur burokracinë dhe duke shmangur dyfishimin. Në Kosovë, OKB-ja operon përmes misionit UNMIK, i themeluar më 1999 sipas Rezolutës 1244 si mision paqeruajtës, por që tashmë funksionon me një numër të vogël të stafit. /Klankosova.tv