Gjykata e Balit dënon me burgim të përjetshëm një ukrainas për laborator droge

Një gjykatë indoneziane ka dënuar një burrë ukrainas me burgim të përjetshëm për rolin e tij në një rrjet të gjerë droge ruso-ukrainas që vepronte në ishullin turistik të Balit. Autoritetet tajlandeze arrestuan Roman Nazarenko, i cili ishte listuar si i arratisur nga Interpoli, në aeroportin Suvarnabhumi të Bangkokut në dhjetor, ndërsa ai përpiqej të ikte në Dubai, dhe më pas e ekstraduan atë në Indonezi, raporton “AlJazeera”, transmeton Klankosova.tv. Nazarenko kishte kaluar shtatë muaj në arrati pasi policia bastisi një vilë pushimi në Bali në maj 2024, duke gjetur një laborator në bodrum që përdorej për të rritur marihuanë dhe për të prodhuar një pararendës të drogës sintetike ekstazi. Gjatë gjyqit të Nazarenkos në Gjykatën e Qarkut në Denpasar të enjten, prokurorët argumentuan se ai ishte një nga trutë e një rrjeti droge. Ukrainasi pretendoi se ishte mashtruar për t'u bashkuar me rrjetin dhe qëndroi ulur në heshtje ndërsa trupi gjykues prej tre gjyqtarësh dha një dënim me burgim të përjetshëm. Autoritetet arrestuan gjithashtu dy vëllezër ukrainas, Mykyta Volovod dhe Ivan Volovod, dhe një rus, Konstantin Krutz, gjatë bastisjes së mëparshme në vilë. E njëjta gjykatë dënoi secilin prej burrave me nga 20 vjet burg. /Klankosova.tv