Lajmet e fundit
Në komunën e Gjilanit të martën është hapur zyra e Këshillit të Nxënësve të Shkollave të Mesme.
Në hapjen e saj drejtori i Arsimit, Nazim Gagica, ka thënë se ky është hap me rëndësi sepse në kuadër të drejtorisë do të jetë edhe zyra e këshillit me të cilën do të thellojnë bashkëpunimin për të ofruar zgjidhjet më të mira për nxënësit e komunës së Gjilanit.
“Është kjo zyre e para në nivel të Republikës së Kosovës që po hapet për këshillin e nxënësve. Me angazhime konkrete do të vazhdohet bashkëpunimi edhe gjatë të ardhmes. Hapi i parë i konsultimit të përbashkët dhe i mbështetjes së plotë të nxënësve ka qenë vendimi për anulimin e parambrëmjeve dhe është mbështetur nga nxënësit, prindërit dhe nga shkollat në përgjithësi. Hapa të tillë do të ndërmerren edhe gjatë të ardhmes, gjithmonë në shërbim të nxënësve, ngritjen e cilësisë së arsimit dhe krijimin e kushteve më të mira”, thuhet në njoftimin e komunës së Gjilanit, përcjellë Klan Kosova.
Ndërkaq, kryetari i Këshillit të Nxënësve Ensar Shaqiri, ka falënderuar Komunën e Gjilanit, respektivisht Drejtorinë Komunale të Arsimit, për hapësirën e ofruar dhe bashkëpunimin për të gjitha çështjet e nxënësve.
Ai ka thënë gjithashtu se me këtë ofrim së bashku dhe me përfshirjen e këshillit në vendimmarrje do të bëhen gjithmonë zgjidhjet më të mira të mundshme.
