Gjigandi i energjisë, Saudi Aramco rrit dividentët pavarësisht rënies së fitimit

Saudi Aramco ka raportuar një rënie të madhe të fitimeve, pasi gjigandi i energjisë uli prodhimin dhe çmimet e naftës ranë ndjeshëm në 2023-ën. Fitimet e saj ranë 25 për qind në 121 miliardë dollarë fitime pas një viti rekord në 2022, shkruan BBC, transmeton Klankosova.tv. Por kjo shifër është ende fitimi i dytë më i lartë ndonjëherë për kompaninë e mbështetur nga shteti. Firma tha se po rritte pagesat e saj për aksionerët dhe po kërkonte mundësi për të investuar në Kinë. Dividentët do të rriten në 98 miliardë dollarë, një rritje prej pothuajse një të tretës krahasuar me vitin 2022, kur ajo arriti një fitim rekord prej 161 miliardë dollarësh, falë ndikimit që pati lufta e Rusisë në Ukrainë në çmimet e energjisë. Çmimet e naftës arritën në 130 dollarë për fuçi në vitin 2022. Shteti saudit zotëron gati 95 për qind të kompanisë, kështu që fitimet e para rezultuan në një suficit buxhetor për mbretërinë në 2022.