Gazetari dënohet me tetë vjet burgim

Një gjykatë në Azerbajxhan ka dënuar me tetë vjet burgim një gazetar të njohur për kritika ndaj qeverisë. Gjykata e Krimeve Serioze në qytetin Shaki ka shpallur Elcin Ismayillin fajtor për zhvatje dhe keqpërdorim të detyrës. Ismayilli është arrestuar në muajin shkurt, pasi një zyrtar i Departamentit për Kulturë dhe Turizëm ka thënë se gazetari ka bërë përpjekje të marrë para nga ai. Ismayilli mohon çdo keqbërje, shkruan Radio Europa e Lirë. Avokati i tij, Elcin Sadiqov, tha se rasti është i motivuar politikisht. Ai po ashtu tha se Ismayilli nuk do të duhej të akuzohej për shpërdorim të zyrës, sepse nuk ka zyrë. Qeveritë perëndimore dhe grupet e të drejtave të njeriut thonë se qeveria e presidentit azerbajxhanas, Ilham Aliyev, e ruan pushtetin duke persekutuar mediat e pavarura, gazetarët dhe politikanët e opozitës. Alieyev i hedh poshtë kritikat.

klankosova.tv