Facebook nuk u rekomandon më shfrytëzuesve t’u bashkohen grupeve civile e politike

Kompania amerikane e rrjetit social Facebook, do ta ndalojë së rekomanduari përdoruesve që të bashkohen në grupe “civile dhe politike”. Përmes një mase të tillë synohet që të zvogëlohet numri i postimeve politike ndaj përdoruesve, shkruan BBC, transmeton Klan Kosova. Ky vendim vjen disa javë pas protestave që u zhvilluan në Washnigton ku përkrahësit e ish-presidentit Donald Trump po e kundërshtonin humbjen e tij në zgjedhjet presidenciale 2020. Ishte Mark Zuckerberg ai që e bëri të ditur këtë vendim përmes një telefonate që pati me disa investitorë. “Njerëzit nuk duan që politika dhe luftimet të marrin përsipër”, ka thënë Zuckerberg. Sidoqoftë, ende mbetet e paqartë se çfarë saktësisht nënkuptohet me “grupet civile” dhe si ky ndryshim mund të ndikojë në fushatë. Një zëdhënës i Facebook ka thënë se kompania është ende duke i përcaktuar rregullat dhe mënyrën se si do të funksionojë ndryshimi në fjalë.

klankosova.tv