Erdogan akuzon SHBA-në për “thikë pas shpine”

Lëvizjet për të lehtësuar problemet ekonomike të Turqisë kanë dështuar të ndalojnë trazirat e tregut, ndërsa problemet mes Turqisë e Shteteve të Bashkuara të Amerikës vazhdojnë të thellohen, shkruan BBC, njofton Klan Kosova. Presidenti i Turqisë, Recep Tayyip Erdogan, ka thënë të hënën se SHBA-ja po provon “t’ia ngulë Turqisë thikën pas shpine”. SHBA-ja javën që shkoi i ka vendosur sanksione Turqisë pasi Turqia refuzoi të ekstradonte një prift amerikan që është burgosur atje. Sanksionet kanë shkaktuar trazira në tregun turk, ndërsa as masat e marra nga banka qendrore turke nuk kanë zbutur problemet. Erdogan tha në një konferencë të mbajtur në Ankara, kryeqytetin turk, se “ju (SHBA-ja) veproni në njërën anë si partner strategjik, por në anën tjetër gjuani plumba në këmbët e këtij partneri”. “Ne jemi bashkë në NATO, kurse ju provoni të na ngulni thikën pas shpine”.

klankosova.tv