Ekspozon dy pistoleta në Facebook, intervistohet në Polici

Hetuesit policorë të Stacionit Policor të Suharekës kishin gjetur se një i mitur nga fshati Gjinoc kishte ekspozuar dy pistoleta të llojeve të ndryshme në rrjetin social “Facebook” .

Pas mbledhjes së informatave të nevojshme, i mituri është ftuar për t’u paraqitur në stacion dhe është pyetur për rastin.

Gjatë intervistës, në prani të avokatit mbrojtës, i dyshuari ka pranuar t’i dorëzojë në mënyrë vullnetare armët të cilat i posedonte, njofton Klan Kosova.

Lidhur me rastin është informuar prokurori i shtetit i cili ka urdhëruar policinë që të shkojnë në shtëpinë e të dyshuarit për t’i sekuestruar armët.

Në prani të anëtarëve madhorë të familjes, krim teknikët i kanë sekuestruar dy pistoleta;

1. “Bereta” model PX4 me numër serik PX231269


2. “Crvena Zastava” kalibri 9mm numër serik 8758


3. tre karikatorë


4. gjashtëdhjetë fishekë  të kalibrit 9mm.

Provat materiale dhe shkresat e lëndës do t’i kalojnë prokurorisë për procedura të mëtejme sipas procedurës së rregullt ndërsa i dyshuari është liruar.