Ekskluzive: Wesley Clark hyn një orë më herët në Gjykatën Speciale (VIDEO)

Gazetarja e Klan Kosovës, Rina Mujku ka raportuar ekskluzivisht se ish-komandanti suprem i NATO-s, Wesley Clark ka hyrë një orë më herët në ambientet e Gjykatës Speciale. Siç raporton Mujku, Clark bëri këtë veprim për t’u mos takuar me askënd të hyrja e Gjykatës, njofton Klankosova.tv. Clark do të dëshmojë sot në Hagë, si dëshmitari i fundit i thirrur nga mbrojtja e ish-presidentit Hashim Thaçi. Ndërkohë, sipas Mujkut, e cila po qëndron në Hagë nga dje, dhe do ta përcjellë nga afër dëshminë e Clarkut, ai fillimisht do të pyetet për të kaluarën e tij, për gjithë përvojën ushtarake që ka pasur para se të shërbente si gjeneral me katër yje dhe si kryekomandant i Forcave Evropiane të NATO-s, e më pas do të pyetet për gjithçka që di në lidhje me luftën e fundit në Kosovë, transmeton Klankosova.tv. Tema e parë që mbrojtja e Thaçit do të ngrejë ndaj Clarkut do të jetë përpjekja e tij për zbatimin e marrëveshjes së arritur mes Sllobodan Millosheviqit dhe Ibrahim Rugovës në tetor të vitit 1998, e më pas për Rezolutën 1199 të Këshillit të Sigurimit të OKB-së. Më tej, ai pritet të flasë edhe për fushatën 78-ditore të bombardimeve të NATO-s mbi caqet jugosllave, që solli më pas lirinë për Republikën e Kosovës. Përveç kësaj, mbrojtja pritet ta pyesë edhe për marrëveshjen e demilitarizimit dhe hyrjen e KFOR-it në Kosovë në vitin 1999, si dhe për të gjitha përgjegjësitë që ka pasur Hashim Thaçi dhe Shtabi i Përgjithshëm i Ushtrisë Çlirimtare të Kosovës. Wesley Clark, sipas Dhomave të Specializuara të Kosovës në Hagë, nis dëshminë në mesditë.