Dragone: S’ka plan për reduktim të trupave të NATO-s në Kosovë

Kryetari i Komitetit Ushtarak të NATO, Giuseppe Cavo Dragone ka deklaruar se aktualisht nuk ekziston ndonjë plan për reduktimin e trupave të misionit të KFOR-it.

Në një intervistë për RTK gjatë vizitës së tij në Kosovë, zyrtari i lartë i Aleancës Veri-Atlantike theksoi përkushtimin e NATO-s për një ambient të sigurt për gjithë Kosovën, transmeton Klankosova.tv.

Dragone mes tjerash tha se NATO-ja i rishikon rregullisht misionet e saj për të vlerësuar situatën në terren dhe për të përshtatur praninë ushtarake.

“NATO-ja bën rishikimin e misioneve çdo vit për të vlerësuar se si funksionojnë, si angazhohet personeli në zona të caktuara operimi, e këtë e bëjmë në baza periodike, pra nuk ka ndonjë befasi. Për t’ju dhënë një shembull, në anën tjetër, në vitin 2023, në fund të vitit, kur ndodhi ai incidenti në pjesën veriore, NATO-ja vendosi që të zgjerojë, të rrisë misionin me 1000 trupa shtesë. Kjo do të thotë që jemi fleksibilë në këtë kuptim, por sinqerisht, për aq sa kuptoj unë deri më sot, nuk ka ndonjë plan reduktimi të trupave".

Vizita e tij në Kosovë u zhvillua së bashku me anëtarët e Komitetit Ushtarak të NATO-s, përfshirë 32 gjeneralë dhe admiralë nga vendet anëtare.