Dhoma e Tregtisë dhe Industrisë: Rritja e çmimit të rrymës dhe liberalizimi i shfaqin pasojat e para

Dhoma e Tregtisë dhe Industrisë së Kosovës ka thënë se paralajmërimet e tyre për rritje të çmimeve të produkteve shkaku i rritjes së energjisë për 16.1 për qind dhe liberalizimit të tregut të energjisë, sipas tyre, po vërtetohen edhe nga institucionet përgjegjëse. Në reagimin e kësaj Dhome thuhet se sipas të dhënave të fundit të prezantuara nga Agjencia e Statistikave të Kosovës, çmimet e prodhimit kanë pësuar rritje për 4.1 për qind në tremujorin e dytë të vitit 2025, pra në muajt prill, maj dhe qershor. “Sipas ASK-së, ngritjet më të mëdha sipas degëve të veprimtarive ekonomike vërehen te: energjia elektrike, gazi, avulli dhe furnizimi me ajër të kondicionuar (16,7%); shtypja dhe riprodhimi i mediave të incizuara (9,3%); prodhimi i veshjeve (6,7%); prodhimi i mjeteve motorike (të transportit), rimorkiove dhe gjysmë-rimorkiove (4,2%); prodhimi i produkteve të fabrikuara metalike, përveç makinerisë dhe pajisjeve (2,5%)”. “prodhimi tjetër p.k.t. (1,9%); prodhimi i letrës dhe produkteve prej letrës (1,6%); prodhimi i drurit dhe i produkteve të drurit dhe të tapës, përveç mobilieve: prodhimi i artikujve nga kashta dhe materialeve të gërshetuara - thurëse (1,4%); përpunimi i produkteve ushqimore (0,8%); nxjerrja e xehes së metalit (0,3%); prodhimi i pajisjeve elektrike (0,3%); prodhimi i tekstilit (0,2%); prodhimi i produkteve të gomës dhe të plastikës (0,1%)”, thuhet në reagim, transmeton Klankosova.tv. Tutje, Dhoma e Tregtisë dhe Industrisë së Kosovës tha se këto rritje e bëjnë edhe më të vështirë konkurrueshmërinë e bizneseve vendore dhe rrezikojnë kapacitetin e tyre për të ruajtur vendet e punës. “Prandaj, DhTIK kërkon nga institucionet përgjegjëse që të rishqyrtojnë politikat aktuale të çmimeve të energjisë dhe të marrin masa të menjëhershme për të mbrojtur bizneset dhe konsumatorët nga pasojat e rënda ekonomike”, thuhet në reagim.