Demokrati Jeffries thotë se Trumpi nuk ka bazë për të dërguar trupa në Çikago

Presidenti i ShBA-së, Donald Trump, nuk ka autoritetin për të vendosur trupa në Çikago, tha të dielën udhëheqësi i pakicës demokrate në Dhomën e Përfaqësuesve, Hakeem Jeffries, ndërsa Pentagoni kreu planifikimin fillestar për një vendosje të mundshme. Trump, ka thënë se ndoshta do ta zgjerojë goditjen e tij kundër krimit në Çikago, duke ndërhyrë në një qytet tjetër të qeverisur nga demokratët. Dhe të dielën ai sugjeroi mundësinë e vendosjes së trupave në Baltimore të drejtuar nga demokratët në Maryland. Zyrtarët amerikanë, duke folur në kushte anonimiteti, thanë se Pentagoni kishte pasur një planifikim fillestar se si do të dukej një vendosje e trupave të Gardës Kombëtare në Çikago. Një zyrtar tha se planet ishin pjesë e përpjekjeve të ushtrisë për të parashikuar çdo kërkesë nga Trump dhe vuri në dukje se zyrtarët e lartë të Pentagonit nuk janë informuar ende për to. Nuk është e pazakontë që Pentagoni të planifikojë vendosje të mundshme përpara se të jepen urdhra zyrtarë. Jefries tha se çdo veprim për të vendosur trupa në Çikago ishte një përpjekje e Trump për të prodhuar një krizë. Krimi, përfshirë vrasjet, ka rënë në Çikago vitin e fundit. "Nuk ka asnjë bazë, asnjë autoritet që Donald Trump të përpiqet potencialisht të dërgojë trupa federale në qytetin e Çikagos," tha Jeffries në emisionin "State of the Union" të CNN të dielën. Jefries citoi komentet e bëra nga JB Pritzker, guvernatori demokrat i Illinois, që përfshin Çikagon, i cili tha se nuk kishte emergjencë që justifikonte vendosjen e Gardës Kombëtare ose ushtrisë tjetër. Duke kritikuar Guvernatorin Demokrat Wes Moore për nivelet e krimit në Baltimore, Trump tha se ishte i përgatitur të vendoste trupa edhe atje. Në korrik, departamenti i policisë së Baltimores tha se kishte pasur një ulje dyshifrore të dhunës me armë krahasuar me vitin e kaluar. Qyteti ka pasur 84 vrasje deri më tani këtë vit - më të paktat në më shumë se 50 vjet, sipas kryetarit të bashkisë, shkruan Reuters, transmeton Klankosova.tv.