Çmimi për letërsi “Ali Podrimja” ndahet për shkrimtarin boshnjak, Abdullah Sidran, në ceremoni merr pjesë edhe Kurti

Kryeministri i Kosovës, Albin Kurti, mbrëmë mori pjesë në ceremoninë e ndarjes së Çmimit ndërkombëtar për letërsi “Ali Podrimja”, që sivjet iu nda poetit, shkrimtarit, skenaristit e gazetarit të njohur boshnjak, Abdullah Sidran. Çmimin që e mban emrin e poetit të njohur kosovar, Ali Podrimja, e ndanë Kolegji AAB çdo vit, për personalitete që kanë dhënë kontribut në fushën e letërsisë. Në fjalën e tij, Kurti tha se ndjehet i nderuar që merr pjesë në ceremoninë që nderon krijimtarinë artistike të një poeti, me një çmim që mban emrin e një poeti po ashtu të madh. Ai tha se gjurmët që ka lënë Sidran në letërsinë boshnjake dhe në atë të Ballkanit janë të pashlyeshme, thuhet në njoftimin e Zyrës së Kryeministrit. Në përfundim të ceremonisë, Abdullah Sidran i dhuroi kryeministrit Albin Kurti dy librat e tij më të fundit, “Otkup sirove kože” dhe “A Nurija veli”.