Çifti humb licencën e lokalit pasi klienti piu 40 gota dhe më pas ra pa ndjenja

Një çift në Australi ka humbur licencën e lokalit të tyre pasi autoritetet zbuluan se stafi i barit i kishte shërbyer një klienti rreth 40 pije alkoolike, përpara se ai t’i humbte ndjenjat.

Sipas autoriteteve, punonjësit e një bari normalisht duhet të ndërhyjnë shumë më herët kur një klient konsumon sasi të mëdha alkooli. Megjithatë, kjo nuk ndodhi në Gladstone Hotel, në Stockton, në shtetin e Uellsit të Ri Jugor, shkruan Daily Star, transmeton Klankosova.tv.

Rregullatorët zbuluan se stafi i lokalit nuk ndërhyri gjatë dy rasteve të ndara të konsumit ekstrem të alkoolit nga i njëjti klient.

Sipas AFP, incidenti më i rëndë ndodhi më 23 mars 2024. Burri hyri në lokal pak pas mesditës dhe u largua rreth pesë orë më vonë. Gjatë kësaj kohe, ai kishte konsumuar 19 birra, një tequila dhe një gotë Cointreau.

Dëshmitarët thanë se klienti shihej duke u penguar në mobiliet e lokalit dhe duke u bërë tepër miqësor me klientët e tjerë, ndërsa kalonin orët.

Pamjet e kamerave të sigurisë, të publikuara nga Departamenti i Mikpritjes dhe Turizmit të New South Wales, tregojnë burrin duke u rrëzuar në rrugë menjëherë pasi doli nga lokali. Më pas, një kalimtar i erdhi në ndihmë dhe ai u ndihmua të hipte në një automjet.

Pavarësisht shenjave të qarta se klienti ishte në gjendje të rënduar nga alkooli, autoritetet konstatuan se menaxheri i barit, Mark Keegan, vazhdoi t'i shërbente pije, madje i solli edhe një gotë tjetër birrë përpara se ai të kishte mbaruar të mëparshmen.