Challandes: Është nder të luash kundër ekipit më të mirë në botë - jemi munduar të përgatitemi sa më mirë

Trajneri i Kombëtares së Kosovës Bernard Challandes, ka folur para ndeshjes që Kosova do të luajë nesër kundër Spanjës. Challandes në konferencë për media tha se "Dardanët" do ta kenë përpara ekipin më të mirë në botë. Ai theksoi se janë mundur të përgatiten sa më mirë për këtë ndeshje. "Pas humbjes nga Suedia nuk është e lehtë të vijmë këtu në Spanjë dhe të përgatitemi për këtë ndeshje. Por, është nder dhe kënaqësi të luajmë kundër ekipit më të mirë në botë. Jemi munduar të përgatitemi sa më mirë dhe jemi të gatshëm". Pas humbjes prej 0:3 në "Fadil Vokrri" nga Suedia, trajneri i kombëtares theksoi se ky takim do të jetë mundësi e mirë për të parë se deri ku ka përparuar ekipi. "Unë menaxhoj një ekip të mirë, ekip më lojtarë shumë të motivuar. Jemi shtet i ri i futbollit dhe duhet të përparojmë, duhet të marrim çdo ndeshje një nga një. Në veçanti ndeshja kundër Spanjës është mundësi për ta treguar progresin e ekipit që është bërë në mënyrë konstante dhe gjatë kësaj periudhe". Në konferencë foli edhe mesfushori Hekuran Kryeziu. Kryeziu tha se kundër spanjollëve do ta bëjnë më të mirën. "Ka qenë një ndeshje e vështirë me Suedinë, ne e kemi analizuar atë ndeshje dhe jemi të gatshëm për Spanjën. Është kënaqësi të luajmë kundër Spanjës dhe mendoj se jemi të gatshëm dhe të fokusuar të përballemi me ekipin më të mirë në botë. Do të mundohemi të japim më të mirën nga kjo ndeshje". Nesër me fillim prej orës 20:45 Kosova do ta zhvillojë ndeshjen e dytë në kuadër të kampanjës kualifikuese për Kampionatin Botëror "Qatar 2022" kundër Spanjës.