Britania e Madhe ia heq etiketimin terrorist HTS-së së Sirisë

Qeveria britanike hoqi të martën Hay'at Tahrir al-Sham (HTS), grupin që drejtoi aleancën rebele siriane që ndihmoi në rrëzimin e Presidentit Bashar al-Assad, nga lista e saj e organizatave terroriste të ndaluara. HTS, një ish-degë e lidhur me al-Kaedën, u ndalua në vitin 2017, që do të thotë se Britania e Madhe e shpalli atë grup terrorist, duke e bërë të paligjshme mbështetjen ose bashkimin me të. Qeveria tha në dhjetor të vitit të kaluar se mund ta rishqyrtonte ndalimin, ndërsa administrata e Presidentit Donald Trump revokoi përcaktimin e HTS-së si organizatë terroriste e huaj në korrik, shkruan BBC, transmeton Klankosova.tv. Qeveria britanike tha në një deklaratë se heqja e HTS-së nga lista e organizatave të ndaluara do të lejonte një angazhim më të ngushtë me qeverinë e re siriane. Ajo shtoi se do të lejonte gjithashtu bashkëpunimin me Sirinë për të eliminuar programin e armëve kimike të Asadit. “Mbretëria e Bashkuar do të vazhdojë të bëjë presion për përparim të vërtetë dhe ta mbajë qeverinë siriane përgjegjëse për veprimet e saj në luftën kundër terrorizmit dhe rivendosjen e stabilitetit në Siri dhe në rajonin e gjerë",  tha qeveria.