Biden: SHBA-ja e gatshme të përdorë forcën për të ndaluar Iranin të marrë armë bërthamore

Presidenti amerikan Joe Biden është zotuar se Shtetet e Bashkuara janë  "të përgatitura të përdorin të gjithë elementët e fuqisë së tyre kombëtare" për të ndaluar Iranin që të marrë një armë bërthamore. Biden e bëri deklaratën me kryeministrin izraelit Yair Lapid në ditën e dytë të vizitës së tij atje. Izraeli e konsideron programin bërthamor iranian si kërcënimin e tij më të madh, megjithëse Irani këmbëngul se ai është paqësor. Presidenti amerikan do të zhvillojë bisedime me zyrtarët palestinezë të premten përpara një vizite të diskutueshme në Arabinë Saudite. Biden përshkroi një sërë angazhimesh strategjike që mbështesin marrëdhëniet e SHBA me Izraelin - aleatin e tij më të ngushtë rajonal - në një dokument të njohur si Deklarata e Përbashkët e Partneritetit Strategjik të Jerusalemit SHBA-Izrael, raporton BBC, tranmeton Klankosova.tv. Ai gjithashtu u zotua se SHBA-ja do të "punojë së bashku me partnerët tanë të tjerë për t'u përballur me agresionin dhe aktivitetet destabilizuese të Iranit", duke përfshirë përdorimin e Iranit të "organizatave terroriste si Hezbollahu, Hamasi dhe Xhihadi Islamik Palestinez". Shtetet e Bashkuara dhe Izraeli kanë akuzuar prej kohësh Iranin për terrorizëm të sponsorizuar nga shteti në Lindjen e Mesme dhe më gjerë. Irani ofron fonde, trajnime dhe armë për lëvizjen e fuqishme Hezbollah të Libanit, dhe grupet palestineze Hamas dhe Xhihad Islamik në Rripin e Gazës. Irani mohon se sponsorizon terrorizmin dhe thotë se organizatat që ai mbështet janë grupe të rezistencës që luftojnë agresionin izraelit dhe amerikan.