Bashkësia Islame merr vendim si duhet të pastrohen kufomat e të infektuarve me koronavirus

Bashkësia Islame e Kosovës sqaron procedurat që do të zbatohen me rastin e pastrimit të kufomave të cilët kanë qenë të infektuar me koronavirus. Në njoftimin e BIK-ut thuhet se me rastin e vdekjes së personit si pasojë e infektimit me koronavirus, nëse kufoma përgatitet në morgun e Qendrës Klinike dhe Universitare e Kosovës, atëherë ndalohet hapja e arkivolit. “Në rastin e vdekjes së personit si pasojë e infektimit me koronavirus (konfirmuar nga IKSHPK-ja), nëse kufoma përgatitet, pastrohet dhe mbyllet hermetikisht në morgun e QKUK-së, atëherë ndalohet hapja e arkivolit dhe xhenazja do të varroset pa u pastruar nga autoriteti fetar, ndërsa Namazi i xhenazes do t’i falet pas varrosjes, duke respektuar distancën e duhur sociale në raport Imam-Xhemat”. Sipas këtij vendimi, me rastin e vdekjes së personit për të cilin dyshohet se ka qenë i infektuar me koronavirus, të vdekurit do t’i derdhet vetëm uji nga sipër, pa e prekur me duar trupin e tij. “Në rastin e vdekjes së personit për të cilin dyshojmë apo frikësohemi se mund të ketë qenë i infektuar me koronavirus, xhenazja do të pastrohet në atë mënyrë që të vdekurit do t’i derdhet vetëm uji sipër, pa e prekur me duar trupin e tij”, thuhet tutje në vendim. Në rastet e tjera, BIK-u u bën thirrje imamëve dhe qytetarëve që t’i respektojnë udhëzimet e Institutit Kombëtar të Shëndetit Publik.