Asnjë ministër nuk pati guxim t'i bëjë sigurimet shëndetësore, thotë Ramaj (VIDEO)

12 vjet Ligji për Sigurime Shëndetësore mbeti vetëm në letër. Kushdo që erdhi në krye të Qeverisë e Ministrisë së Shëndetësisë e premtoi jetësimin e tij. Megjithatë, ministrat u ndërruan e praktika jo. Sot e asaj dite, qytetarët e Kosovës të vetmit në Evropë e rajon, janë pa sigurime shëndetësore. Njohësja e shëndetësisë, Saranda Ramaj, thotë për Kiks Kosova se asnjëra qeveri nuk e ka pasur prioritet sistemin e sigurimeve shëndetësore. Ikja e politikanëve nga përgjegjësia, ajo thotë se është shkaku që 12 vite pas miratimit të Ligjit për Sigurime Shëndetësore, më nuk flitet as për mbledhjen e premiumeve, e as për mekanizmin kryesor të jetësimit të këtij sistemi. Prandaj, Ramaj pohon se të dhënat e pacientëve ende mblidhen me laps e letër, gjë që ndikon në grumbullimin e të dhënave të pasakta e shpenzimeve pa rezultate. Kjo situatë, ajo thotë se rrezikon mirëqenien dhe shëndetin e pacientëve, të cilët jo rrallë janë viktima të mashtrimit. Investimet dhe vendimmarrja për politikat e mëdha publike ajo thotë se duhet të bazohet në evidencë, e cila sipas saj, sigurohet vetëm me Sistemin e Informimit Shëndetësor (SISh) dhe sigurimeve shëndetësore. Lidhur me këtë sistem dhe personat e angazhuar për këtë punë, Kiks Kosova ka pyetur Shërbimin Spitalor Klinik dhe Universitar të Kosovës. Nga ky institucion përmes një përgjigje në e-mail dërguar emisionit, pretendojnë se SISh-i është funksional në të gjitha spitalet dhe klinikat publike. Për SISh-in në veçanti, e sigurimet shëndetësore në përgjithësi, emisionit nuk i ktheu asnjë përgjigje Ministria e Shëndetësisë. Sipas Bankës Qendrore, aktualisht në Kosovë operojnë 12 kompani të sigurimeve, dy prej të cilave për ushtrimin e veprimtarisë në sigurimin e jetës. Nga shuma totale që paguajnë qytetarët kosovarë për sigurime, rezulton se më pak se 5 për qind shkon për sigurimin e jetës. Bazuar në të dhënat e BQK-së, në 2024-ën, kosovarët paguan 160.4 milionë euro për sigurimet jo-jetë, ku hyjnë edhe sigurim i shëndetit dhe aksidentet, ndërkaq kompanitë e sigurimeve kompensuan 75.6 milionë euro dëme e shpenzime, 19.7 milionë euro për kategorinë “sigurim shëndetësor dhe aksidente”. Kurse, deri më 30 nëntor 2025, primet bruto arritën në 161.5 milionë euro. Për aksidente dhe shëndetin, sipas Bankës Qendrore, kosovarët paguan 35.13 milionë euro. /Klankosova.tv https://youtu.be/OwEWpRtSZn8