Lajmet e fundit
Një burrë i akuzuar për kërcënime përpara Paradës së Ditës së Shën Patrikut të së shtunës në Yonkers, SHBA, tani po përballet me akuza federale.
Ridon Kola akuzohet se ka kërcënuar me vrasje policët dhe kryebashkiakun në paradë.
“Kjo është zakonisht ajo që terroristët duan të bëjnë. Ata duan të terrorizojnë mendjen tuaj, të terrorizojnë mendimet tuaja dhe t’ju bëjnë të frikësoheni”, tha kryebashkiaku Mike Spano, raporton CBS, transmeton Klankosova.tv.
Një hetim i shumë agjencive zbuloi kërcënime shqetësuese në mediat sociale.
Kola, me prejardhje shqiptare, dyshohet se shprehu mbështetje për ekstremizmin radikal islamik.
FBI thotë se ai i dërgoi një mesazh direkt policisë së Yonkers këtë muaj, duke shkruar, “Unë do të kryqëzoj policët e Yonkers dhe shefat e tyre përgjatë rrugës McLean. Do të jetë një skenë tmerri... Allahu Ekber”.
32-vjeçari jeton pranë rrugës së paradës dhe është marrë në pyetje nga forcat e rendit në të kaluarën.
Këtë herë, anëtarët e Task Forcës së Përbashkët të Terrorizmit FBI-NYPD përgjuan dhe arrestuan Kolën.
Ai u përball me një gjykatës në gjykatën federale të premten.
Njerëzit që jetojnë në këtë zonë ndihen të lehtësuar.
“Është e frikshme, por është mirë të dish se ata janë kapur. Gjithmonë është dikush që përpiqet të bëjë diçka”, tha banorja e Yonkers, Maria Oriol.
Prokurori i SHBA-së thotë se vetëm këtë muaj, Kola lavdëroi Sayfullo Saipov, duke e quajtur atë vëllain e tij. Saipov po vuan burgim të përjetshëm për përdorimin e një kamioni për të përplasur dhe vrarë tetë persona, duke plagosur të tjerë, në një sulm terrorist në rrugën e biçikletave në West Side të Mahnattan në Halloween 2017.
“Shumicën e herëve këto gjëra janë të pabaza. Në shumicën e rasteve këto gjëra nuk dalin jashtë, por duhet të jemi vigjilentë 100 për qind”, tha Spano.
Spano thotë se do të ketë forca të mjaftueshme të ligjit në rrugën e paradës të shtunën, si me uniformë ashtu edhe me rroba civile. /Klankosova.tv
Rrini të informuar mbi zhvillimet kryesore duke u bërë pjesë e komunitetit tonë në Viber
