Arrestohet në Budapest 45-vjeçari shqiptar i dënuar me 5 vjet burgim

Një 45-vjeçar shqiptar i shpallur në kërkim është arrestuar në Budapest. Bëhet fjalë për Auron Hajdini alias Auron Hysaj, i cili është dënuar me 5 vjet burgim për vjedhje me dhunë. Atij i kanë mbetur për të kryer edhe 2 vjet, 11 muaj e 16 ditë burg. “Falë informacionit të siguruar nga Departamenti i Policisë Kriminale në Policinë e Shtetit dhe i shkëmbimit të tij me Policinë hungareze, nëpërmjet Interpol Tiranës, u bë i mundur arrestimi në Budapest, me qëllim ekstradimi në Shqipëri, i shtetasit shqiptar: Auron Hajdini alias Auron Hysaj, 45 vjeç. Ky shtetas ishte shpallur në  kërkim ndërkombëtar nga Interpol Tirana, pasi Gjykata e Apelit  Tiranë, me vendimin e datë 21.02.2024, e ka dënuar me 5 vjet burgim, nga të cilat i kanë mbetur për të kryer 2 vjet, 11 muaj e 16 ditë”, njofton policia. Në vitin 2013, Hysaj në bashkëpunim me shtetas të tjerë, ka dhunuar rojën e një pusi nafte dhe i kanë marrë një sasi nafte, një automjet, një armë gjahu, një celular dhe disa dokumente, shkruan A2Cnn, transmeton Klankosova.tv. Interpol Tirana, në bashkëpunim me autoritetet hungareze, vijon punën për finalizimin e procedurave të ekstradimit të 45-vjeçarit, në Shqipëri.