Arrestohet 23-vjeçari që kërkohej nga Gjykata e Tiranës për shitje dhe prodhim të narkotikëve

Policia e Shqipërisë ka arrestuar një 23-vjeçar, i shpallur në kërkim në kuadër të operacionit “Blloku 33”. Më parë, gjatë zhvillimit të këtij operacioni, policia kishte sekuestruar 1 kilogramë e 964 gramë kokainë, 450 gramë heroinë, dy armë zjarri, 29 celularë, gjashtë automjete, katër peshore elektronike dhe shuma të konsiderueshme parash si dhe gjatë periudhës hetimore janë sekuestruar 85 kilogramë lëndë e dyshuar narkotike Cannabis Sativa, transmeton Klankosova.tv.. A. H., sipas njoftimit të policisë, ishte shpallur në kërkim pasi Gjykata e Tiranës i ka caktuar masën e sigurisë “Arrest në burg”, për veprën penale ”Prodhimi dhe shitja e narkotikëve”. Derisa po vijon puna për lokalizimin dhe kapjen e të dyshuarve të tjerë të shpallur në kërkim në kuadër të këtij megaoperacioni. Materialet i kaluan Prokurorisë së Tiranës, për veprime të mëtejshme.