Arabi plagosi doktorin që i ndihmoi gruas në lindje

Autoritet e Arabisë Saudite, e kanë arrestuar një burrë, i cili e ka qëlluar me armë doktorin që i kishte ndihmuar gruas së tij të lindte, me arsyetimin se një doktoreshë grua do të duhej të asistonte në lindje. Doktori Muhannad Al Zabn, kishte asistuar në lindjen e bebes në prill të këtij viti në Spitalin e Mbretit Fahat në Riad, shkruan Independent, transmeton Klan Kosova. Babai i bebes, i kishte përcjellë falënderimet doktorit dhe i kishte kërkuar të takoheshin ën spital, për t’ia shprehur mirënjohjen personalisht për punën që kishte bërë. Dyshja e kishin lënë të takohen në kopshtin e spitalit për të folur për ardhjen në jetë të fëmijës së tij, kur burri kishte nxjerrë armën dhe e kishte qëlluar doktorin duke e lënë të lënduar rëndë. Ai ishte larguar menjëherë nga vendi i ngjarjes, mirëpo policia saudite e kishte arrestuar më vonë. Doktori menjëherë është përcjellë në shërbimin intensiv të spitalit, derisa gjendja e tij të bëhet më stabile.