Lajmet e fundit
Ambasadorja e BE-së Christiane Hohmann ka parë nga afër ecurinë e procesit të votimi elektronik në qytetin e Elbasanit.
Ajo u ndal në Qendrën e Votimit 23 51 ku u informua mbi ecurinë e procesit ndërkohë që i bëri thirrje qytetarëve shqiptarë të marrin pjesë masivisht në zgjedhje për të ushtruar të drejtën e tyre themelore.
“Eshtë kënaqësi të jem në Elbasan për të vizituar një nga qendrat e votimit elektronik. Siç edhe mund ta keni parë procesi po ecën normal, pa problem dhe qytetarët po ushtrojnë të drejtën e tyre për të votuar.
Thirrja ime për sot është që sa më shumë qytetarët të ushtrojnë të drejtën e tyre për të votuar dhe dita të vijojë pa probleme e qetë.
Ajo që do të vendosin qytetarët sot është kush do të qeverisë qytetin në 4 vitet e ardhshme, kush do të jenë përfaqësuesit e tyre në Këshillat Bashkiakë”, tha Hohman.
Ambasadorja e BE u pyet nga gazetarët në lidhje me pretendimet e Kandidatit Luciano Boçi për presion ndaj votuesve. Hohmann tha se në të gjitha qendrat e votimit janë vendosur vëzhguesit e OSBE-ODIHR dhe raporti i tyre do të jetë tregues mbi problematikat e hasura.
“Unë jam shumë e lumtur që OSBE ka në Shqipëri një ekip të plotë vëzhguesish. Ju e dini që 10 ditë më parë ata dhanë konkluzionet e tyre paraprake për gjetjet e tanishme. Na lejoni të presim ditën e nesërme kur të keni raportin e tyre pas zgjedhjeve për të parë gjetjen e tyre”, shtoi ambasadorja. /TCH
