Ambasadori gjerman: Na duhen institucione stabile, punoni për të mirën e vendit

Ambasadori gjerman në Kosovë tha se të gjithë aktorët politikë duhet të mendojnë për të mirën e vendit dhe të mbështesin agjendën evropiane, duke nënvizuar rëndësinë e institucioneve stabile për të ruajtur momentumin pozitiv. Këto komente, Rainer Rudolph i bëri në një intervistë për RTK-në, teksa tha se miqtë ndërkombëtarë nuk mund ta bëjnë punën e vetë shtetit të Kosovës. “Mesazhi për të gjithë aktorët politikë, në të gjithë spektrin, mendojeni se çfarë është më e mira për vendin, në kuptimin e ndërveprimit tuaj me ne, pra me miqtë tuaj ndërkombëtarë, për agjendën ndërkombëtare evropiane që duhet të shtyhet përpara. Ajo çfarë mund të bëjmë ne si miq të këtij shteti, është që ta marrim këtë dinamikë që vjen nga vetë vendi, që rrjedh nga vetë vendi, nuk mund ta krijojmë këtë vetë, dhe për të pasur këtë momentum pozitiv, na duhen institucione stabile që e përfaqësojnë vendin”, u shpreh ambasadori gjerman, raporton Klankosova.tv. Tutje, ai tha se Ligji për të huajt duhet të zbatohet në mënyrë që të mos pengojë jetën e përditshme të qytetarëve dhe pakicave, duke ruajtur shërbimet shëndetësore dhe arsimore. Ambasadori gjerman potencoi se partneriteti me Kosovën është i fortë dhe i përkushtuar, me fokus në zgjerimin e bashkëpunimit në ekonomi, tregti, investime, zhvillim dhe përgatitjen e vendit për anëtarësim në BE.