Ahmeti kujton komandant Kumanovën: Vepra e tij, flakadan që ndriçoi rrugën e UÇK-së

Kreu i BDI-së në Maqedoni të Veriut, Ali Ahmeti, ka kujtuar heroin e kombit, Ismet Jasharin-Kumanova, në 27-vjetorin e rënies së tij. Përmes një postimi në Facebook, Ahmeti thotë se vepra e Jasharit ishte flakadan që ndriçoi rrugën e Ushtrisë Çlirimtare të Kosovës dhe frymëzoi shqiptarët kudo për t’u bashkuar në kauzën kombëtare, transmeton Klankosova.tv. “27 vjet pa heroin e kombit, Ismet Jashari-Kumanova. Sot kujtojmë jo vetëm një luftëtar të lirisë, por një shok veprimtarie, një mik të pathyeshëm dhe një njeri që nuk e njihte frikën. Ismeti ndër të parët iu përgjigj thirrjes për liri që vinte nga Kosova, duke u bërë shembull sakrifice dhe guximi”. “Vepra e tij ishte flakadan që ndriçoi rrugën e Ushtrisë Çlirimtare të Kosovës dhe frymëzoi shqiptarët kudo për t’u bashkuar në kauzën kombëtare. I përjetshëm qoftë kujtimi për Komandant Kumanovën dhe për të gjithë dëshmorët e kombit!”, ka shkruar kreu i BDI-së.