Abdixhiku: Nuk kam urrejtje për kundërshtarët, këtë ua lë atyre që s’bënë gjë për katër vjet

Kandidati për kryeministër nga radhët e LDK-së, Lumir Abdixhiku gjatë tubimit në Viti, tha se nuk ka urrejtje për kundërshtarët e tij, pasi thotë se kohë për të humbur nuk ka më. Ai shton se urrejtjen, përçarjen, ndarjen e frustrimin ia lë partisë në pushtet, e cila sipas Abdixhikut nuk bëri asgjë për katër vjet, transmeton Klankosova.tv. “Edhe në këtë fushatë, nuk kam fjalë urrejtje për kundërshtarët e mi, nuk kam nxitje për të tjerët që nuk mendojnë si ne, nuk kam as vullnet për t’iu mbajtur në mllefin e brendshëm, sepse kohë për të humbur nuk kemi më. Urrejtjen, frustrimin, ndarjen e përçarjen ua lëmë atyre që s’bënë asgjë në katër vjet, qytetarëve u japim zgjidhjen, shpresën, u japim programin model që Kosovën e transformon në  një shtet shembullor”, u shpreh kandidati për kryeministër. Abdixhiku shprehet i bindur se më 9 shkurt  LDK do ta marr fitoren, e siç thotë ai, do bëjë rikthimin historik. Tutje ai tha se LDK është e Kosovës, e i takon qytetarëve të Kosovës. “Jemi mbledhur këtu, për të dhënë kushtrimin e madh të djathë të Vitisë e të krejt Kosovës, se Lidhja Demokratike e Kosovës është ngritur përfundimisht në këmbë, dhe më 9 shkurt shënon fitoren e madhe historike të rikthimit masiv”. “Kjo valë e tubimeve që nisi në Prishtinë e vazhdoi në çdo qytet të Kosovës,  u ndal këtu mes jush, është jo vetëm manifestim i fuqisë sonë elektorale, por është thirrje e afrimit, përbashkimit  me secilin qytetarë të Republikës, sepse Lidhja Demokratike e Kosovës është e popullit, sepse LDK i takon qytetarëve të Kosovës. Faleminderit që po i jepni kushtrimin fitores, faleminderit që po i përgjigjeni thirrjes sonë për ndryshim”, tha Abdixhiku.