“A e ke shti?" dhe "Ku e ke shti vizën?" - Pyetjet me të shpeshta mes ushtarakëve të FSK-së (VIDEO)

Përtej krenarisë që kryeministri Albin Kurti, ka për Forcën e Sigurisë së Kosovës, e në veçanti deminierët, rrëfimet e pjesëtarëve të ardhura nga ky batalion zbulojnë një realitet tjetër, edhe shumë shqetësues. Përveç mospagesës për rrezikshmëri, orëve shtesë dhe vikendeve, FSK po përballet me një mori problemesh që, në heshtje, po e zbrazin ushtrinë nga kuadrot më të trajnuara: deminierët. Ani pse të përgatitur me vite për një nga detyrat më të rrezikshme në vend, ata sot po e shohin largimin nga uniforma si të vetmen zgjidhje. Këto po vijnë edhe për shkak të mungesës së pajisjeve adekuate, kushteve të papërshtatshme të punës dhe rrezikimit të vazhdueshëm të jetës në terren. Pyetjet më të shpeshta që dëgjohen në këtë kazermë janë: “A e ke shti?” dhe “ku e ke shti vizën?”, dhe këto nuk janë raste të izoluara, por që, sipas dëshmive, janë të përditshme, ku përveç largimit drejt mërgimit, ndonjëherë po zëvendësojnë edhe uniformën ushtarake me atë të Policisë së Kosovës. E këto largime duket se kanë ardhur si pasojë e faktit që, shpeshherë, ata, përveç mungesës së barnave dhe medikamenteve jetike për punën e tyre, thonë se kompania e deminimit është lënë pas dore edhe sa u përket pajisjeve më bazike. Të gjitha detajet do t’i kuptoni në kronikën e realizuar nga Kiks Kosova: https://www.youtube.com/watch?v=bmKb5jV0kMg