Lajmet e fundit
Rreth 1500 persona vizitojnë çdo ditë Parkun Arkeologjik të Butrinit. Siti arkeologjik që është cilësuar pasuri botërore nën mbrojtjen e UNESCO-s. Për shkak të zhvillimit aty të disa eventeve me rëndësi ballkanike dhe promovimit të kohëve të fundit, numri i vizitorëve ka shënuar një rritje prej 47.7 për qind në krahasim me vitin e kaluar.
Drejtori i Parkut, Gjergji Mano, thotë për TCH se për shkak të rritjes së numrit të vendeve nga vijnë turistët, guidat do të ofrohen edhe në dy gjuhë të tjera: në polonisht dhe në gjuhën kineze.
“Me kënaqësi konstatojmë se në gjashtë muajt e parë të këtij viti, në krahasim me të njëjtën periudhë të vitit të kaluar, kemi pasur një rritje prej 47.7% të numrit të vizitorëve dhe 59% të të ardhurave.
Këtë vit pretendojmë që të kapim shifrën 120 deri në 130 mijë vizitorë. Gjeografia e vendeve nga vijnë këta turistë tashmë është zgjeruar, madje mund të themi se së shpejti gudiave dhe hartave të sitit arkeologjik do t’i shtohen edhe dy gjuhë të tjera: gjuha polake, për shkak të numrit të madh të qytetarëve polakë të cilët na vizitojnë, si dhe gjuha kineze", thotë ai.
