12 të arrestuar në Greqi, mes tyre edhe shqiptarë

12 persona janë arrestuar nga policia e Greqisë. Në mesin e të prangosurve ka edhe shqiptarë e po ashtu edhe një punonjës i policisë. Dyshohet se këta ishin përfshirë në një incident të armatosur në Pire, jashtë një klubi të natës. Fillimisht, ata ishin përleshur fizikisht e më pas kishte kërcitur edhe arma e zjarrit, shtatorin e vitit të kaluar duke rrezikuar edhe jetën e qytetarëve përreth. Operacioni u udhëhoq nga Drejtoria për Luftimin e Krimit të Organizuar dhe Departamenti për Krime kundër Jetës dhe Pronës. Arrestimet u kryen në zona të ndryshme të kryeqytetit grek, Athinës transmeton Klankosova.tv. Gjatë bastisjes në banesat e të dyshuarve, u gjetën dhe u sekuestruan një arsenal armësh: pistoleta, revolverë, armë gjahu, dhjetëra fishekë, 14 thika, karikatorë, anabolikë, drogë, tre makina, një motorr dhe një shumë të madhe parash – 175 mijë e 470 euro. Po ashtu u sekuestruan veshjet e përdorura gjatë natës kritike kur edhe ndodhi përleshja mes dy grupeve. Të arrestuarit përballen me akuza të rënda, përfshirë krijimin e një organizate kriminale, tentativë vrasjeje me dashje, dhunë të rrezikshme fizike, shpërdorim detyre dhe shkelje të ligjeve për armët dhe drogën. Sipas policisë greke, shumica e të dyshuarve janë me të kaluar kriminale. Hetimet vijojnë për të zbardhur plotësisht veprimtarinë e këtij rrjeti të rrezikshëm.