Kadrijaj i përgjigjet deputetes së VV-së: Kur Gjini i ktheu pushkën Serbisë, ju s’e keni ditë ku është vija e frontit

Ish-deputetja e Aleancës për Ardhmerinë e Kosovës(AAK), Time Kadrijaj, ka reaguar ashpër ndaj deklarimeve të ish-deputetes së VV-së, Arbëreshë Kryeziu Hyseni, e cila kishte bërë krahasime që, sipas saj, cenojnë figurat e luftës dhe vlerat e lirisë së Kosovës. Kadrijaj në një postim në rrjetin social Facebook, ka shkruar se është e dhimbshme të shihet, siç u shpreh ajo, niveli i ulët i diskursit politik, duke e cilësuar të papranueshme çdo përpjekje për të bërë paralele mes nënkryetarit të AAK-së, Ardian Gjini, dhe Serbisë, transmeton Klankosova.tv. “Kur Ardian Gjini dhe djemtë e vajzat më të mira të këtij vendi ia kthyen pushkën Serbisë, shumë prej jush as nuk e kanë ditur ku është vija e frontit. Nëse Ardiani nuk flet për luftën, e bën sepse është njeri me parime dhe nuk e përdor gjakun as kur ju e përdorni krejt makinerinë propaganduese kundër tij”, ka shkruar Kadrijaj. Ajo ka shtuar se përdorimi i gjuhës ndarëse, sipas saj, po e dëmton Kosovën më shumë se çdo gjë tjetër, duke theksuar se problemet politike nuk mund të mbulohen me sulme ndaj figurave të luftës. Kadrijaj ka kërkuar ndaljen e, siç e quajti ajo, “lojërave të ulëta politike” dhe kthimin e debatit në nivel institucional e dinjitoz. Ish-deputetja e LVV-së, përmes një postimi në Facebook, tha se deklarimet e Ardian Gjinit janë të njëjta me ato të Serbisë. “Një nga titujt kryesor në mediat serbe sot është edhe ky: ‘Vetëvendosja do të përpiqet të motivoj diasporën që të dalin në zgjedhje me presione të reja mbi serbët’”. “Ndërkohë titujt kryesor në disa media tona: 1. Fatmir Limaj, ‘Qonu burra e gra, ta drejtojmë Kosovën në drejtimin e duhur, ta largojmë Albinin, Kosova e ka kryer me Albinin’. 2. Ardian Gjini drejtuar diasporës: ‘Mos e votoni Albin Kurtin se jeni tu na marrë në qafë’”. “Të njejtën thirrje Serbia. Të njejtën piskamë opozita në Kosovë. Çfarë rastësie. Çfarë ngjashmërie”, shkroi Kryeziu Hyseni.